पर्वती दर्शन चाळीमध्ये मिरजकर कुटुंबीयांनी केलाय प्रेक्षणीय असा किल्ला.
दिवाळी म्हटलं की, मुलांसाठी मज्जाच मज्जा. फराळ, फटाके, नवीन कपडे, शाळेला सुट्टी..आणखीन एक महत्वाचे म्हणजे मातीचा किल्ला. कुठून कुठून शोधून आणलेली माती, दगड, विटा, पोती इ. सामान गोळा करून हाताने चिखल करून आणि त्याच बरोबर अंगावरील कपड्यांचा विचार न करता मुलांनी तयार केलेला किल्ला. पण हल्ली मोबाईल आणि इंटरनेटच्या विळख्यात मुले अडकत चालली आहेत. त्यामुळे दिवाळीतील किल्ला हा प्रकार कमी होत चालला आहे. परंतु अजूनही काही ठिकाणी प्रेक्षणीय असे किल्ले बनविले जात आहेत. महाराष्ट्राचे दैवत छत्रपती श्री शिवाजी महाराज यांच्या आठवणी जागृत केल्या जात आहेत.
पुणे- पर्वती दर्शन येथील चाळीमध्ये ‘मिरजकर’ कुटुंब गेले अनेक वर्ष दिवाळीनिमित्त किल्ला बनवते. यावर्षी त्यांनी बनविलेला पन्हाळगड, विशाळगड आणि पावनखिंड हा किल्ला नागरिकांचे आकर्षण ठरत आहे. त्यांनी वीर बाजी प्रभू देशपांडे यांची पावनखिंडीतील लढाई किल्ल्याच्या स्वरुपात हा हलता देखावा उभा केला आहे.
कै. अशोक मिरजकर आणि त्यांचे बंधू अनिल मिरजकर यांनी आपल्या घराजवळ दरवर्षी भव्य असे वेगवेगळे किल्ले बनवत असत. आणि त्यांची परंपरा पुढील पिढी चालवत आहे. शिवप्रेमी असणाऱ्या मिरजकर कुटुंबीयांनी आजपर्यंत सिंहगड, सिंधुदुर्ग, रायगडावरती शिवराज्याभिषेक सोहळा, प्रतापगड आणि किल्याच्या पायथ्याशी अफजलखानाचा वध, शनवार वाडा, लाल महल, सारसबाग, पर्वती आदी वास्तु किल्याच्या स्वरुपात केल्या आहेत.
याविषयी अशोक मिरजकर यांचा मुलगा ऋषिकेश मिरजकर यांनी सांगतले कि, ‘वडील शिवप्रेमी असल्यामुळे दिवाळीत आम्हाला घेऊन किल्ला तयार करीत असत. आम्ही सर्व मिरजकर कुटुंबीयांनी तीच परंपरा कायम ठेऊन पुढची पिढी देखील तेवढ्याच आत्मियतेनी किल्ला बनविण्याची काम करत आहे. या कामात माझी सहचरणी भाग्यश्री हिचा मोलाचा वाटा असतो. किल्यावरील मावळे, शिवाजी महाराज आम्ही बाजारातून न आणता भाग्यश्री स्वतः हाताने तयार करते. कापड, कापूस, गवत, तारा इ. गोष्टी वापरून मूर्ती तयार करते. आणि महत्वाचे म्हणजे घरातली रोजची कामे सांभाळून आम्ही सर्व मिळून हे सारे करत असतो. या कामात माझा मुलगा मयंक, भाऊ आनंद, पुतण्या समर्थ आम्ही सर्व मिरजकर कुटुंब मिळून किल्ला बनवतो. किल्ला बनविण्यामागे आम्हा मिरजकर परिवाराचा एक हेतू आहे की, आपल्या पुढीच्या पिढीला छत्रपती शिवरायांचा इतिहास कळला पाहिजे. त्यासाठी दिवाळीनिमित्त किल्ले बनवायची संख्या घरोघरी ही वाढली पाहिजे. सध्याच्या मोबाईलच्या युगात मुलांनी मातीचे किल्ले घरोघरी स्वतः हाताने बनवावेत. त्यांच्यामध्ये याविषयी आवड निर्माण व्हावी.’
पुण्यातील सर्व भागातून शिवप्रेमी किल्ला पाहण्यास भेट देत आहेत. तसेच मिरजकर यांच्या किल्याना आजपर्यंत अनेक बक्षिसे, स्मृतीचीन्हे देखील मिळालेली आहेत.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
