पुणे – कात्रज कोंढवा क्षेत्रीय कार्यालय हद्दीतील कोंढवा साईनगर येथे धक्कादायक प्रकार उघडकीस आला आहे. कचरावेचक महिला उषा किशोर शिंदे आणि सहाय्यक आयुक्त राजेंद्र कादमाने यांना या प्रकरणात मारहाण झाली. याप्रकरणी कोंढवा पोलिस ठाण्यात एका कुटुंबाविरुद्ध गुन्हा दाखल करण्यात आला आहे. कोंढवा पोलिसांच्या माहितीनुसार उषा शिंदे गेल्या पंधरा वर्षांपासून कोंढवा येवलेवाडीतील साईनगर वॉर्डामध्ये लेन नंबर १३ येथे कचरा गोळा करतात.
९० रुपये टाळण्यासाठी पुलाखाली कचरा
साईनगर परिसरात एक कुटुंब काही दिवसांपासून घरगुती कचऱ्यासाठी दरमहा आकारले जाणारे ९० रुपये शुल्क देण्याचे टाळण्यासाठी कचरा कचरावेचकांना न देता थेट कात्रज येथील पुलाखाली फेकत असल्याचे महापालिकेच्या कर्मचाऱ्यांच्या निदर्शनास आले होते. या मुद्द्यावरून गुरुवार दिनी सदर कुटुंब आणि वॉर्ड अधिकाऱ्यांमध्ये शाब्दिक वाद झाला. त्यावेळी संबंधित कुटुंबाने कादमाने यांना धक्काबुक्की केली. त्यावेळी शिंदे यांनी मध्यस्थी करून शांतता निर्माण करण्याचा प्रयत्न केला होता, तेव्हा सदर कुटुंबाने त्यांना सुद्धा मारहाण केली. या घटनेत हातातील काचेच्या बांगड्या तुटल्याने त्या जखमी झाल्या आहेत.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
