दि पूना मर्चंटस् चेंबर व हमाल पंचायत यांच्या संयुक्त विद्यमानाने कामगार महिलांचा सन्मान
पुणे – दि पूना मर्चंटस् चेंबर व हमाल पंचायत यांच्या संयुक्त विद्यमानाने गेली ३७ वर्षे राबविण्यात येत असलेल्या स्त्री कामगार कल्याण योजनेमार्फत गुळ भूसार विभागातील स्त्री कामगारांचा स्नेह मेळावा व बोनस वाटप कार्यक्रम झाला. सदर कार्यक्रमास जितो लेडीज विंगच्या अध्यक्षा एकता भन्साळी प्रमुख पाहुणे म्हणून उपस्थित होत्या. त्यामध्ये दिवाळी निमित्त स्त्री कामगारांना प्रत्येकी रु. १७,०००/- बोनसचे वाटप भन्साळी यांच्या हस्ते करण्यात आले.
सदर प्रसंगी एकता भन्साळी म्हणाल्या की, ‘अश्या कष्टकरी महिलांचा सन्मान माझ्या हस्ते ठेवल्याबद्दल मी दि पूना मर्चटस् चेंबर व हमाल पंचायतीला मनपूर्वक धन्यवाद देते. आपला परिसर स्वच्छ ठेवण्याचे काम या महिला करत असतात. स्वच्छतेमुळे ‘लक्ष्मी’ वास करते आणि त्यासोबत नागरिकांचे आरोग्य देखील चांगले राहते. आजूबाजूचे वातावरण छान राहते. अशा महिलांचे कौतुक व त्यांच्या प्रती कृतज्ञता व्यक्त करण्याचे महत्वाचे काम चेंबर करत असून चेंबरचे हे काम खूप कौतुकास्पद आहे. कष्टकरी महिलांची मेहनत हीच पुंजी आहे. हा सन्मान, बोनस त्यांच्या परिश्रमाच्या फळाचे प्रतीक आहे.’ यावेळी त्यांनी दिवाळीनिमित्त सर्वांना शुभेच्छा दिल्या.
चेंबरचे अध्यक्ष राजेंद्र बाठिया यांनी याप्रसंगी चेंबरच्या विविध उपक्रमांची माहिती देऊन सांगितले की, ‘स्त्री कामगार कल्याण योजने अंतर्गत बाजारपेठेत धान्य निवडणे, झाडलोट आदी कामे करणाऱ्या सुमारे ८५ महिला कामगारांना दिपावली बोनस देण्यात येत आहे. चेंबर व हमाल पंचायतच्या सहकार्याने स्त्री कामगारांच्या कल्याणासाठी ही योजना शासनाच्या कोणत्याही मदतीशिवाय गेली ३७ वर्षे अखंडीतपणे सुरु आहे.’
सदर कार्यक्रमास चेंबरचे अध्यक्ष राजेंद्र बाठिया, उपाध्यक्ष अजित बोरा, सचिव ईश्वर नहार, सहसचिव आशिष दुगड, माजी अध्यक्ष रायकुमार नहार, प्रविण चोरबेले, उत्तम बाठिया, संदिप शहा, नविन गोयल, दिनेश मेहता, सुहास दोशी, हरिराम चौधरी, निखील मेहता तसेच स्त्री कामगार कल्याण योजना समितीचे अध्यक्ष शाम लढ्ढा, उपाध्यक्ष महिपालसिंह राजपुरोहित, सदस्य सचिन रायसोनी, सचिन गोयल, तसेच अनिल भन्साळी, अल्पेश भन्साळी आणि जितो लेडीज विंगच्या पदाधिकारी व हमाल पंचायतचे सचिव गोरख मेंगडे, खजिनदार चंद्रकांत मानकर व पदाधिकारी आणि सभासद उपस्थित होते. अशी माहिती स्त्री कामगार कल्याण योजना समितीचे अध्यक्ष शाम लढ्ढा यांनी दिली.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
