भूम आणि परंडा तालुक्यातील आपत्तीग्रस्तांना भांड्यांचे कीट, साड्या आणि गुळाच्या ढेपांचे वाटप
पुणे- नुकत्याच झालेल्या अतिवृष्टीमुळे धाराशिव जिल्ह्यातील भूम आणि परंडा तालुक्यातील अनेक गावांत पूराचे पाणी शिरल्याने जनजीवन विस्कळीत झाले आहे. अनेक कुटुंबांचे संसार उघड्यावर आले असून लोकांना मोठ्या अडचणींचा सामना करावा लागत आहे. या संकटाच्या काळात सामाजिक जबाबदारीची जाणीव ठेवून राजस्थान फाउंडेशन पुणे चैप्टर तर्फे भूम आणि परंडा तालुक्यातील पूरग्रस्त नागरिकांना सातशे भांड्यांचे कीट, साड्या आणि गुळाच्या ढेपांचे वाटप करण्यात आले.
उळूप, साडेसांगवी, बुर्हााणपूर, चिंचपूर ढगे, सुकटा, चिंचोली (भूम तालुका) तसेच वाघेगव्हाण (परंडा तालुका) या गावांमध्ये मोठ्या प्रमाणात झालेल्या पावसामुळे नागरिकांचे खूप नुकसान झाले आहे. घर, शेती आणि पशुधन वाहून गेल्याने ग्रामस्थांचे संसार उद्ध्वस्त झाले आहेत. या कठीण काळात राजस्थान फाउंडेशनच्या पदाधिकाऱ्यांनी प्रत्यक्ष गावांमध्ये जाऊन मदतीचा हात पुढे केला. राजस्थान फाउंडेशन हे महाराष्ट्र आणि राजस्थानमधील व्यापारी समाज, सांस्कृतिक उपक्रम आणि सामाजिक कार्य यांमधील सेतू म्हणून कार्यरत आहे. या फाउंडेशनचे अध्यक्ष राजस्थानचे मुख्यमंत्री भजनलाल शर्मा आहेत.
या मदतकार्याच्या आयोजनात पुणे चैप्टरचे अध्यक्ष मंगल चौधरी, उपाध्यक्ष राजेंद्र बाठिया, सचिव रमेश कासट, खजिनदार इंदर छाजेड, तसेच रमेश चौधरी, ओमप्रकाश चौधरी, खंडेलवाल, रवींद्र मणियार, महेंद्र व्यास आणि सुभाष अग्रवाल यांचे मोलाचे योगदान राहिले आहे.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
