राष्ट्रवादीचे प्रशांत गांधी ( शप ) यांचे पुण्याच्या जिल्हाधिकाऱ्यांना निवेदन
पुणे – पुणे शहर हे विद्येचे माहेरघर आहे. इथे देशाच्या कान्याकोपऱ्या मधून हजारो विद्यार्थी शिक्षणासाठी येतात. परंतु सध्या चालू असलेल्या गॅसच्या तुटवड्यामुळे सर्व विद्यार्थ्यांचे खाण्याचे हाल होताना दिसत आहे. याबाबत राष्ट्रवादी काँग्रेसचे (शरद पवार) पुणे शहर चिटणीस प्रशांत गांधी यांनी गुरुवारी (दि. १२) पुण्याच्या जिल्हाधिकाऱ्यांना निवेदन दिले आहे. सध्या सुरू असलेल्या युद्धजन्य परिस्थितीमुळे सर्वत्र गॅसचा तुटवडा दिसत आहे. पुण्यातील बहुतांश हॉटेल बंद होण्याचा मार्गावर आहेत. त्यामुळे बाहेरून पुण्यात शिक्षणासाठी आलेल्या विद्यार्थ्यांचे जेवणाचे हाल होत आहेत. बहुतांशी विद्यार्थ्यांची जेवणाची व्यवस्था घरगुती डबा किंवा आजूबाजूला असलेले छोट्याशा मेस मधून होत असते. सध्या हा विद्यार्थ्यांचा खऱ्या अर्थी ‘परीक्षेचा’ काळ सुरु आहे. अनेक विद्यार्थी पुण्यात स्पर्धा परीक्षा आणि उच्च शिक्षणाची तयारी करत आहेत. विद्यार्थ्यांसाठी ही त्यांच्या आयुष्यातील निर्णायक वेळ आहे. व्यावसायिक गॅस सिलेंडरचा पुरवठा विस्कळीत झाल्याने शहरातील अनेक खानावळी बंद पडण्याच्या मार्गावर आहेत. अशा वेळी विद्यार्थ्यांना गावालाही जाता येत नाही. पुण्यात व्यावसायिक सिलेंडर मिळणे कठीण झाल्याने गॅस एजन्सी बाहेर रांगा लागल्या आहेत. चढ्या दराने सिलेंडर खरेदी करावा लागणार असल्याने खानावळ चालकांना खानावळ चालवणे अवघड झाले आहे. आणि म्हणूनच याचा विचार करून त्वरित प्राधान्य क्रमाने लहान खानावळ व मेस यांना गॅस उपलब्ध करून द्यावा. तसे शक्य नसल्यास त्यांना आपण घरगुती गॅस वापरण्याची परवानगी द्यावी. जेणेकरून विद्यार्थ्यांचा खाण्याचा फार मोठा प्रश्न सुटेल. अश्या आशयाचे निवेदन जिल्हाधिकारी यांना देण्यात आले आहे.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
