यशवंत नाट्य-कला मित्र परिवार यांच्या वतीने कार्यक्रमाचे आयोजन
पुणे – कोथरूड येथील यशवंतराव चव्हाण नाट्यगृह येथे (दि. १२) यशवंत नाट्य-कला मित्र परिवार यांच्या वतीने जागतिक महिला दिनानिमित्ताने कोथरूड विधानसभा मतदार संघातील नवनिर्वाचित नगरसेविकांचे सन्मान सोहळ्याचे आयोजन करण्यात आले होते. ॲड. नीलम शिर्के-सामंत (अध्यक्ष बालरंगभूमी परिषद, मुंबई) यांच्या हस्ते पुणे महानगरपालिकेवर नुकतेच निवडून गेलेल्या कोथरूड विधानसभा मतदार संघातील दहा नगरसेविकेंचा सन्मान करण्यात आला. यावेळी दिपाली शेळके (अध्यक्ष पुणे जिल्हा बालरंग भूमी परिषद) यांची विशेष उपस्थिती होती. सदर सन्मान सोहळ्याचे आयोजन यशवंत नाट्य कला मित्र परिवाराचे सत्यजित धांडेकर, आशुतोष वैशंपायन, समीर हंपी, धनंजय पुरकर, गणेश भोसले, दीपक गुप्ते, अमर काळे आणि मित्र परिवार यांनी केले होते.
प्रमुख पाहुण्या नीलम शिर्के-सामंत यांनी सर्व नगरसेविकांना शुभेच्छा देत म्हणाल्या, ‘सर्वांनी बाल कलाकार घडवण्यासाठी माझ्या पाठीशी उभं राहावं. स्टेज वरून कला सादर करत असताना मुलांचा आत्मविश्वास वाढतो.’ मुलांच्या कला जोपसण्याचे भावनिक आवाहन त्यांनी यावेळी केलं. ‘आयोजकांनी महिलांची नाजूक बाब ओळखून त्यांना सर्व सन्मानितांना आज साडी भेट दिली आहे. कपाटात कितीही साड्या असल्यातरी महिलांना नवीन साडीची उत्सुकता असतेच. त्यामुळे आयोजकांचे विशेष आभार.’
प्रास्ताविकात सत्यजित धांडेकर म्हणाले, ‘पुण्याची ओळख सांस्कृतिक राजधानी अशी आहे. परंतु सांस्कृतिक उपक्रमांकडेच महापालिकेचे थोडे दुर्लक्ष होत आहे.’ सांस्कृतिक क्षेत्राची बाजू महापालिकेत प्रभावीपणे मांडावी, अशी अपेक्षाही त्यांनी व्यक्त केली. पुणे महानगरपालिकेच्या नगरसेविका ॲड. वासंती जाधव, ज्योत्स्ना कुलकर्णी, मनीषा बुटाला, दिपाली डोख, अल्पना वरपे, रूपाली पवार, ॲड. मिताली सावळेकर, मंजुश्री खर्डेकर, तेजश्री पवळे आणि रेश्मा बराटे यांचा यावेळी सन्मान करण्यात आला. सर्व नगरसेविकांच्या वतीने तिसऱ्यांदा पालिकेत निवडून गेलेल्या नगरसेविका खर्डेकर म्हणाल्या की, ‘खरंतर वर्षभर महिला दिन सुरूच असतो. कारण अनेक महिला रोजच अनेक क्षेत्रात आपली जबाबदारी पार पाडत घर देखील सांभाळत असतात. असे म्हणत ‘कला क्षेत्रासाठी अधिकाधिक आर्थिक तरतुद तसेच कलाकारांच्या नाट्य क्षेत्रातील सोडविण्याचा भविष्यात नक्की प्रयत्न राहील.’ पुढे त्या गमतीने म्हणाल्या की, अभिनय फक्त रंगमच्यावर करता येतो असं काही नाही, कधी कधी आम्हाला देखील नाईलाजाने अभिनय करावा लागतो आणि आम्ही तो सफाईदारपणे करतो देखील. ’कामात सातत्य राखा, सुसंवाद साधा, स्वत:मधील कौशल्यांचा विकास करा,’ असे नवनिर्वाचित लोक प्रतिनिधींना मोलाचे मार्गदर्शन दिपाली शेळके यांनी केले.गायिका राधिका अत्रे आणि गायक विजय खोपकर यांच्या सुरेल आवाजातील ‘आज फिर जीने की तमन्ना है’ गीतांचा कार्यक्रम यावेळी सादर करण्यात आला. या कार्यकमाचे निवेदन डॉ. भाग्यश्री कश्यप यांनी केले. कांर्यक्रमाला माई मसाले आणि गोखले केटरर्स यांचे विशेष सहकार्य लाभले. आभार प्रदर्शन आशुतोष वैशंपायन यांनी तर निवेदन रत्ना दहीवेलकर यांनी केले.
रॅशनल टाईम्स हे डिजिटल बातमी प्रसारित करण्याचे माध्यम श्री.सुनिल चंद्रकांत शेवरे यांच्या मालकीचे असून त्यांनी सावित्रीबाई फुले पुणे विद्यापीठ अंतर्गत असणाऱ्या रानडे इन्स्टिटयूट वृत्तपत्र व संज्ञापन विभाग येथे पत्रकारि तेचे शिक्षण पूर्ण केले आहे.
